如何揀選花膠?🐟



花膠嘅品種其實真係有如天上面嘅星星一樣咁多,你可以想像一下大海入面有幾多唔同種類嘅魚🐟,就即係代表有幾多種唔同類別嘅花膠(當然唔係款款都食得😂)。花膠咁多品種,五花八門,所以我地買之前更加應該由淺入深去了解。要做個聰明嘅消費者,首先應該摸索點樣喺同一批花膠入面去挑選同分辨質素係好定壞,始終花膠有大有細,有厚有薄,有平有貴。


首先,花膠同鮑魚一樣都係講頭數,即係睇一斤有幾多隻,如3頭花膠即係代表一斤只有3隻花膠。頭數愈少愈罕有,亦都越大塊,價錢相對越貴,因為俗語有話,十斤重嘅魚先得一兩膠⚖️。如果重量相近,應該選擇較厚身和較不透光嘅花膠,因為花膠嘅「頭數」就算相同,都會有唔同大細。你可能以為愈大塊愈好,其實厚度先係關鍵,所以買嘅時候,我地通常選擇較厚嘅一塊,口感會較佳。而越深色嘅花膠即係代表上水時間越耐,上水越耐即代表越乾🌞。花膠越舊越好,唔單只質地更結實、色澤更深更金黃,而且會更為乾身,所以浸發起來自然更厚身。不過亦唔可以一本天書讀到老📖,有啲靚花膠雖然好薄身,但脫水脫得乾,一樣可以發得好厚,行內稱為鬆透度高。


其實就算同一品種嘅花膠,相同頭數,都有可能有兩種價錢。有機會係由於喺曬製過程中,工人處理魚鰾嘅手勢無咁好✂️,令花膠出現破損,或者血絲未完全清除,但其實呢啲有瑕疵嘅花膠食療功效同一般花膠無異,只不過係冇咁靚仔,但價錢較相宜,一般平兩成左右,食用嘅話絕對可以考慮👍。反而有一啲太過靚仔嘅花膠,有機會係啲不法商人用不同手法令到賣相更加好,而去漂過,浸發完之後會有一陣異味☠️。


總括而言,一般揀花膠嘅時候可以放喺燈光下照一照💡,若果花膠呈半透明的,質量較好。此外,最好選擇較厚身,表面沒有瘀血,無花心,聞落去無臭味🤭。所謂花心,即係曬乾花膠嘅過程中,陽光或烘焙過熱,形成魚肚表面乾,而中間未乾,日子一耐,魚肚中心變成腐肉,一浸水後就會發出臭味。靚嘅花膠浸發完後應為黏身,切開時甚至會把刀黏住🔪,較次級嘅一食就會化開,比較容易爛。


最重要嘅係要識得分邊啲係假貨,買嘅時候可以細心留意花膠表面有無油膩,因為豬皮縱使經過風乾,仍留有脂肪。假嘅花膠色澤亦較淡偏白,缺少天然生曬嗰種金黃色嘅效果,亦都無顯眼而有序嘅紋理,更加無海水味🌊,仲有可能略帶化學品或塑膠嘅氣味👨🏼‍🔬。

Contact Us:

Phone: +852 3705 3530

Whatsapp: +852 5793 8002

Email: hello@mawgarden.com

  • Grey Facebook Icon
  • Grey Instagram Icon

Copyright © 2020 The Maw Limited. All rights reserved.